«Nus n’ans laschain betg divider!»
Il pled dal president da la Confederaziun Ignazio Cassis a chaschun da sia elecziun sco president da la Confederaziun. Il text original pluriling è vegnì translatà en rumantsch.
Ils 8 da december 2021 ha gì lieu l’elecziun dal president da la Confederaziun. Ignazio Cassis ha salvà ses emprim pled davant l’Assamblea federala. © Keystone
To the article in English.
Dunna presidenta da l’Assamblea federala
Signur president dal Cussegl dals chantuns
Preziadas deputadas e stimads deputads da las Chombras federalas
Preziads cussegliers guvernativs dal chantun Tessin
Chars confamigliars e chars amis
Preziads giasts
Preziadas dunnas e stimads signurs
Cordial engraziament per Vossa confidenza. Jau consideresch l’uffizi dal president da la Confederaziun sco ina gronda onur e sun cumplainamain conscient da la responsabladad ch’è colliada cun quest uffizi.
Ma permettai da pensar l’emprim al president Guy Parmelin ed a la lavur ch’el ha prestà quest onn. Signur president, char Guy, jau vi As engraziar da tut cor. En ina perioda da gronda intschertezza avais Vus tadlà tut il pajais e demussà calma, modestadad e prontezza da far cumpromiss.
La crisa vegn a prender ina fin
Preziadas dunnas e stimads signurs
La pandemia dal coronavirus ans accumpogna ussa gia dapi dus onns. Ella ha influenzà la vita da nus tuts. Independentamain da nossa funcziun, da nossa derivanza sociala u da la lingua che nus discurrin. Ella ans ha rendì attent a quai ch’ans separa: ils malsauns ed ils sauns, ils giuvenils e las persunas main giuvnas, las persunas vaccinadas e las persunas betg vaccinadas, ils centralists ed ils federalists.
Preziadas dunnas e stimads signurs
La pandemia ans ha bain separads, ma ella n’ans ha betg dividids. Ed ella na vegn betg ad ans divider.
La pandemia ans ha chatschads dapart, ma ella n’ans ha betg dividids. Nus n’ans laschain betg divider.
La pandemia ha mussà quant impurtant ch’il tema libertad è per nus. La libertad na stat betg per nagut en il center da nossa Constituziun federala. Ella è noss pli aut bain. Ma libertad signifitga er responsabladad. Responsabladad envers ils mund, envers las proximas generaziuns, responsabladad envers las persunas las pli deblas da nossa societad.
La pandemia pretenda pazienza... ella pretenda blera pazienza.
Vegn questa pandemia a prender ina fin insacura? Stimadas dunnas e preziads signurs, il virus vegn a restar. Ma la crisa vegn a prender ina fin. Il cumbat tranter l’uman e las microbas ans accumpogna gia dapi adina. Ma nus umans essan adina stads buns d’ans revegnir. E quai vegn a reussir er questa giada.
Ils ultims dus onns avain nus realisà quant vulnerabels che nus essan: sco umans. E sco pajais. Ma gist en in temp da vulnerabilitad, da malpazienza creschenta e da polarisaziun smanatschanta stuain nus ponderar tge ch’ans collia, tge ch’è caracteristic per la coesiun naziunala. Tge ch’ans unescha.
La ritgezza da la diversitad
Nus savain che la coesiun e la diversitad èn sfidas permanentas. Nossas differentas linguas, culturas, religiuns e tendenzas politicas chaschunan in dialog per part stentus, malempernaivel e schizunt char. Ma questa sfida è noss motor, nossa raschun d’esser.
La diversitad intimescha d’esser modest. I n’è betg in luxus, mabain ina gronda ritgezza. Ella ans gida a chattar las dretgas soluziuns. Ella è la funtauna da l’innovaziun.
Tge che vala per l’individi, vala er per noss pajais: diversitad pretenda energia, engaschament e toleranza envers la frustraziun.
Diversitad signifitga da sa metter cuntinuadamain en la pel da l’auter. Diversitad signifitga er d’esser pront da desister d’insatge. Per che er il visavi sa movia. Quai na vala betg mo per la dumonda da l’Europa.
Il pievel svizzer ed ils chantuns han francà en la constituziun (jau citesch):
Questa stima da la diversitad è in act permanent da voluntad. En il decurs dals tschientaners ans ha ella garantì segirezza, bainstar ed independenza. Jau ans giavisch che quest act da voluntad vegnia vivì er l’onn 2022.
Jau sun persvas: mintga crisa è er in impuls per metter en dubi sa sezza u sa sez, da chapir meglier sa sezza u sa sez. Da s’avischinar ad auters e da sviluppar cuminaivlamain novas ideas per l’avegnir. Diversitad stgaffescha ritgezza d’ideas. Tras diversitad nascha innovaziun. La Svizra n’è betg per casualitad in dals pajais ils pli innovativs dal mund.
Nus n’ans laschain betg divider
Preziadas dunnas e stimads signurs
La pandemia pretenda era durant quest enviern bler da nus. Nus essan dumandads sco individis, ma era sco societad.
La pandemia ans ha separads, ma ella n’ans ha betg dividids. Ed ella na vegn betg ad ans divider.
Preziadas dunnas e stimads signurs
La pandemia ans ha separads, ma n’ans ha betg dividids. Nus n’ans laschain betg divider!
Jau sper che l’onn 2022 daventia in onn, en il qual nus tadlain in sin l’auter, in onn d’equiliber tranter las partidas ed in onn creativ – per che nus daventian anc pli fermas e ferms ed anc pli unids che al cumenzament.
Per finir vi jau engraziar a mia famiglia, a mes amis ed en spezial a mia dunna Paola. Grazia per la forza e la pazienza, cun la quala vus m’accumpagnais e sustegnais en questa funcziun.
E grazia a vus tuttas e tuts qua en sala, per la confidenza, per l’attenziun dad oz e durant ils proxims mais.
