Destinaziun Svizra taliana

Sin invit dal chantun Tessin parta il president da la Confederaziun Ignazio Cassis ils 14 da settember 2022 cun il tren spezial davent da Berna per viagiar en la Svizra taliana. Là han lieu las festivitads per ses onn presidial. Sin ses viadi vegn el accumpagnà dal cusseglier federal Guy Parmelin sco er da parlamentarias e parlamentaris, da collavuraturas e collavuraturs da l'administraziun federala e da giasts illusters da l'entira Svizra. Il tren sa ferma quatter giadas per inscunters cun represchentantas e represchentants d'autoritads chantunalas e communalas sco er cun la populaziun.

14.09.2022
Su una cartina della Svizzera è segnato il percorso del viaggio del presidente Cassis come anche i comuni che parteciperanno ai festeggiamenti.

Sin invit dal chantun Tessin parta il president da la Confederaziun Ignazio Cassis cun il tren spezial davent da Berna per viagiar en la Svizra taliana. Là han lieu las festivitads per ses onn presidial. © DFAE

Les staziuns del viadi.

L'avantmezdi a las 11.00. A la staziun a Berna stat in tren spezial per il president da la Confederaziun cun destinaziun Lugano. Il viadi en il Tessin maina sur la veglia lingia dal Gottard – ch'è in simbol per la diversitad da la Svizra. Sin via vers Lugano sa ferma il tren trais giadas: ad Airolo, a Biasca ed a Bellinzona. A Lugano han lieu las festivitads per l'elecziun dal president da la Confederaziun Ignazio Cassis. La festa era planisada per il december 2021, ha dentant stuì vegnir spustada pervia da la pandemia dal coronavirus.

Il viadi da return maina la saira tras il nov tunnel da basa dal Gottard – che represchenta la forza innovativa da la Svizra. Quest tunnel n'ha betg mo battì tut ils records, mabain ha er laschà s'avischinar il nord ed il sid dal pajais. La diversitad e l'innovaziun èn dus elements da success da la Svizra. Els èn il fil cotschen durant l'entir onn presidial 2022. 

Staziuns

Ad Airolo, a Biasca, a Bellinzona ed a Lugano datti inscunters cun represchentantas e represchentants da las autoritads e da la populaziun da l'entira Svizra taliana. Las vischnancas tessinaisas participadas han tschernì ina fotografia represchentativa da lur regiun, ch'ellas vegnan a regalar al president da la Confederaziun.

Les staziuns del viadi

Airolo

Grazia ad ina capodovra tecnica da l'onn 1880 dovra il tren main che 8 minutas per il viadi da Göschenen ad Airolo. Cun forzas unidas e cun in engaschi extraordinari han plirs pajais e blers lavurants contribuì a questa ovra da construcziun tschientenara. Davant il monument «Le vittime del lavoro» da Vincenzo Vela vegnan commemoradas las pliras tschient persunas ch'èn mortas durant la construcziun dal tunnel.

Il president da la Confederaziun Ignazio Cassis vegn retschavì da las autoritads d'Airolo e da la Leventina, che al surdattan dus maletgs da la regiun, sco er d'ina delegaziun dal chantun Uri.

Al perrun da la staziun d'Airolo vegn il president da la Confederaziun retschavì da las autoritads e da la populaziun.
L'emprima fermada sin terren tessinais: Airolo! Ils presidents communals beneventan il president da la Confederaziun Ignazio Cassis cun maletgs e cun ils megliers giavischs per l'ulteriur decurs da l'onn presidial. © EDA

Biasca

A Biasca vegnan ensemen trais valladas: la Leventina, la Riviera e la Val dal Blegn. A Biasca è vegnida inaugurada l'onn 1895 l'emprima ovra electrica dal Tessin. Ed oz sa chatta qua il portal sid dal tunnel da basa dal Gottard. L'emprima vischnanca tessinaisa cun glisch electrica è percunter stada Faido. Valladas cun spiert da pionier!

Ignazio e Paola Cassis cun la populaziun sin la plattafurma da Biasca.
Segunda fermada: Biasca! © EDA

Biasca è in lieu spezial per Ignazio Cassis. El e sia dunna Paola Rodoni ch'è da Biasca, han maridà qua.

Las autoritads da Biasca e dals districts dal Blegn e da la Riviera retschaivan il president da la Confederaziun cun maletgs da la regiun. 

Biasca (PDF, 1 Pagina, 326.8 kB)

Riviera (PDF, 1 Pagina, 470.9 kB)

Bellinzona

A Bellinzona, la chapitala dal chantun Tessin, èn vegnidas festivadas l'onn 1986 l'elecziun dal cusseglier federal Flavio Cotti e l'onn 2017 l'elecziun dal cusseglier federal Ignazio Cassis. Bellinzona è er la porta vers l'ulteriura Svizra taliana: Da qua davent circuleschan ils autos da posta mellens en la Mesolcina ed en la Val Calanca, duas da las quatter vals italofonas dal Grischun. Sur Bellinzona maina er la via en la regiun da Locarno, ina regiun ch'è fitg appreziada dals giasts da vacanzas da la Svizra e da l'exteriur.

Il perrun da la staziun da Bellinzona è plain represchentantas e represchentants da las autoritads sco er abitantas ed abitants che retschaivan cordialmain il tren spezial.
A Bellinzona cuntinuescha la scuntrada cun las autoritads e cun la populaziun. Il perrun è decorà cun bleras bandieras svizras. © EDA

A la staziun vegn il president da la Confederaziun retschavì da la presidenta dal parlament chantunal, dal president da la Regenza tessinaisa e da las autoritads da Bellinzona, da Locarno e da la Vallemaggia. 

Bellinzona (PDF, 1 Pagina, 427.0 kB)

Cevio (PDF, 1 Pagina, 247.7 kB)

Locarno (PDF, 1 Pagina, 250.9 kB)

Lugano

Quai è la patria dal cusseglier federal Ignazio Cassis. Qua ha cumenzà sia carriera politica. A Lugano ha el salvà ses emprim pled dal 1. d'avust sco cusseglier federal ed ha organisà dapi lura differentas scuntradas internaziunalas. In term impurtant da l'onn presidial è stada la Ukraine Recovery Conference il fanadur 2022.

La populaziun ch'è sa radunada sin la Piazza della Riforma a Lugano sa participescha a la ceremonia uffiziala.
«Quai è Vossa festa»: Las festivitads da la populaziun cuntinueschan sin la Piazza della Riforma. © EDA

A la staziun da Lugano vegn il president da la Confederaziun retschavì da represchentantas e represchentants da las autoritads da Lugano sco er da las vischnancas da Collina d'Oro (lieu da domicil dad Ignazio Cassis), da Tresa (lieu da naschientscha e d'uffanza dad Ignazio Cassis), da Mendrisio e da Chiasso.

Sin la Piazza Riforma s'inscuntra il president da la Confederaziun cun la populaziun. «24 onns suenter las ultimas festivitads en onur d'in president da la Confederaziun italofon giavisch jau, che l'entira Svizra taliana sa sentia sco part da questa festa», spera Ignazio Cassis. 

Lugano (PDF, 1 Pagina, 119.0 kB)

Collina d’Oro (PDF, 1 Pagina, 266.1 kB)

Tresa (PDF, 1 Pagina, 241.4 kB)

Mendrisio (PDF, 1 Pagina, 324.1 kB)

Chiasso (PDF, 1 Pagina, 227.4 kB)

Agenda dal president da la Confederaziun

Dapi il cumenzament da l'onn presidial èn passads bunamain 9 mais. Ils temas diversitad ed innovaziun furman vinavant il fil cotschen dals differents inscunters en Svizra ed a l'exteriur. La Ukraine Recovery Conference ch'è vegnida organisada en la Svizra italofona, è stada in term impurtant. Curtas novitads e fotografias dattan ina invista dals inscunters d'enfin ussa dal president da la Confederaziun Ignazio Cassis. 

L’agenda del presidente della Confederazione

Inizio pagina